شہزاد اظہر کی طویل علالت کے بعد وفات پر دو دن اس کی شعری عظمت کے گن گا کے فراموش کردیا گیا ۔ اس شہر میں افتخار عارف ، کشور ناہید اور ان کے بعد ان کے کاسہ لیسوں کے علاوہ نہ کسی کو پنپنے دیا گیا ہے نہ شاعرانہ تفاخر کے ساتھ ان کو زندہ رہنے دیا گیا ہے ۔
لیکن اب تیزی سے بدلتے ہوۓ حالات اور ڈھلتی ہوٸی بیوفا عمریں منظر نامے کو تیزی سے تبدیل کرتی نظر آ رہی ہیں ۔ کیا کوٸی سوچ سکتا تھا کہ اوورسیز پاکستانی کنوینشن ہو اور اس کے مشاعرے کا ٹھیکہ ادبی اسٹیبلشمینٹ کے ہاتھ سے نکل جاۓ۔ اسی طرح اب اکیڈمی آف لیٹرز کے بجٹ سے زر کثیر ہڑپ کرکے اپنے فراٸض اور ذمہ داریوں سے چشم پوشی کرنے والوں کے بارے میں بھی سوشل میڈیا پر کسی وقت بھی ٹرینڈز شروع ہوسکتے ہیں ۔ کیونکہ جن شاعروں کے معاشی تحفظ اور تخلیقی کام کے فروغ کے لیے یہ ادارہ بنا تھا ان کو ہی نشانے پر رکھا گیا ہے ۔
مجھے یقین ہے کہ کتنے ہی اور جینوٸن شاعروں کی طرح عماد اظہر کو بھی ان اداروں میں مراعات کے مزے لیتے گھس بیٹھیوں اور ادبی قبضہ مافیا نے اپنے شاعر کُش ریڈار پر دھر رکھا ہوگا کیونکہ اس نے اپنی تخلیقی قابلیت اور کلام کے زور پر خود کو عظیم شعراء کے ورثے کا امین ثابت کر دیا ہے ۔ وہ اسلام آباد کے بوڑھے شاعروں کی طرح ساٹھ ساٹھ سالوں سے مکھی پر مکھی مارنے کی بجاۓ ہر دفعہ ایک نٸے اور پہلے سے جداگانہ موضوعات کو پوری شعری تاثیر کے ساتھ شعر کے قالب میں ڈھالتا نظر آتا ہے ۔ آپ کبھی غور کریں کہ ہمارے ارد گرد پھیلے بوڑھے شاعر جس طرح کا شعر چالیس سال پہلے گھڑ رہے تھے آج بھی اسی مخصوص لفظی اور تلازماتی داٸرے میں گھومے جا رہے ہیں ۔ جبکہ عماد اظہر کے ہاں ارتقاء کا سفر اتنا نمایاں ہے کہ آسانی سے تصویر کیا جاسکتا ہے ۔ بحیثیت تخلیق کار اس کے ہاں آواز جیسے مظہر کی تخلیق اور خاموشی جیسی ہستی کا اعتراف ایسا شعری رویہ ہے جو کسی دوسرے شاعر میں نظر نہیں آتا۔
میں گزشتہ دنوں سے سوشل میڈیا پر واٸرل ہونے والی اس کی ایک ویڈیو کے اشعار کا لطف لے رہا ہوں ۔ میری خواہش ہے کہ آپ بھی یہ اشعار سنیں اور لطف لیں ۔ اس کے علاوہ ویڈیو میں کچھ بلکل سُن بٹھے حضرات کی شکلیں بھی دیکھیں اور مزا لیں ۔
فرحت عباس شاہ

کوزہ ء خواب ۔ گزشتہ کو دوبارہ سے بھرا
میں نے مٹی کی جگہ دشت کو دریا سے بھرا

غار میں سوۓ ہوئے لوگ بتا سکتے ہیں
چشم۔خوابیدہ کو کس چشم۔نظارہ سے بھرا

شاہزادی ترے بے عیب ارادوں کی قسم
میں نے ہر دست۔دعا تیری تمنا سے بھرا
۔۔۔۔۔۔۔۔۔۔۔

اک تماشا ہی سہی بارِ دِگر جاتی ہے
ناو چلتی ہے مگر ریت سے بھر جاتی ہے

یہ جو تنہائی ہے بچھڑے ہوئے لوگوں کا غرور
ساتھ جاگی ہوئی دیوار سے ڈر جاتی ہے

میں لگاتا ہوں زمانے میں زمانو ں کی گرہ
مجھ کو معلوم ہے آواز کدھر جاتی ہے
عماد اظہر